പ്രണയം – കവിത – അനിത ജോൺ

0
26

മഴ തോര്‍ന്ന വാനില്‍ വഴവില്ല് കാണ്‍കെ
കുളിരുന്നൊരുണര്‍വാണ് പ്രണയം
മനസ്സിന്‍റെ നിറവാണ് പ്രണയം

തിരതല്ലുമോളങ്ങള്‍ കരയെ പുല്‍കുമ്പോള്‍
അടങ്ങുന്ന ലയമാണ് പ്രണയം
ഒടുങ്ങാത്ത തിരയും പ്രണയം

കരുതുന്ന സ്നേഹത്തെ ഓര്‍ത്തോര്‍ത്തിരിക്കുമ്പോള്‍
വിരിയുന്ന ചിരിയും പ്രണയം
അതിലൂറുന്ന വാക്കും പ്രണയം

ആയിരം താരങ്ങള്‍ നിറയുന്ന വാനിലെ
നിറനിലാവാണ് പ്രണയം
മുഖിലിന്‍റെ ചാരുത പ്രണയം

സൂര്യന്‍റെ വേര്‍പാടില്‍ കുങ്കുമം ചാര്‍ത്തുന്ന
വിണ്ണിന്‍റെ പശ്ചിമം പ്രണയം
ഒരു നീറുന്ന നൊമ്പരം പ്രണയം

വേര്‍പാടില്‍ ഉരുവാകും നോവിന്‍റെ ആധിക്യം
ഹൃദയത്തെ ഞരുക്കിടും പ്രണയം
ചിത്തം മൃതതുല്യമാക്കും പ്രണയം

പ്രണയത്തില്‍ നീറുന്ന മനസ്സിന്‍റെ ഭാവങ്ങള്‍
ഓര്‍മ്മയില്‍ കരുതിടും പ്രണയം
മുറിവുണങ്ങാതെ സൂക്ഷിക്കും പ്രണയം

LEAVE A REPLY

Please enter your comment!
Please enter your name here