“കുഞ്ഞ് വേഗം സുഖം പ്രാപിക്കട്ടെ”; അനസിന്‍റെ കുട്ടിയുടെ ചികിത്സ ഏറ്റെടുത്ത് സര്‍ക്കാര്‍

തിരുവനന്തപുരം: മകന്‍റെ ക്യാൻസര്‍ ചികിത്സയ്ക്കായി നീക്കി വെച്ച തുക മുഖ്യമന്ത്രിയുടെ ദുരിതാശ്വാസ നിധിയിലേയ്ക്ക് സംഭാവനയായി നല്‍കിയ അനസ് അസ്നയ്ക്ക് പിന്തുണയുമായി സംസ്ഥാന സര്‍ക്കാര്‍. ക്യാൻസര്‍ ബാധിതനായ അനസിന്‍റെ മകന്‍റ ചികിത്സ ഉറപ്പു വരുത്താൻ ആവശ്യമായ നടപടികള്‍ സ്വീകരിക്കുമെന്ന് ആരോഗ്യമന്ത്രി കെ കെ ശൈലജ അറിയിച്ചു.
അനസുമായി ഫോണിൽ സംസാരിച്ചതായി ആരോഗ്യമന്ത്രി വ്യക്തമാക്കി. തന്‍റെ വിഷമത്തെക്കാള്‍ അന്യന്‍റെ ദുരിതമാണ് വലുതെന്ന വികാരമാണ് അനസിനെ ഇങ്ങനെ ഒരു പ്രവൃത്തിയിലേയ്ക്ക് നയിച്ചതെന്ന് കെ കെ ശൈലജ പറഞ്ഞു. ചില മനുഷ്യരുടെ തീരുമാനങ്ങളെ എത്ര തന്നെ അഭിനന്ദിച്ചാലും മതിയാകില്ലെന്നും മന്ത്രി ഫേസ്ബുക്കിൽ കുറിച്ചു.
ആരോഗ്യമന്ത്രിയുടെ ഫേസ്ബുക്ക് പോസ്റ്റിന്‍റെ പൂര്‍ണ്ണരൂപം:
ചില മനുഷ്യരുടെ തീരുമാനങ്ങളെ എത്ര തന്നെ അഭിനന്ദിച്ചാലും മതിയാകില്ല. സ്വന്തം മകന്റെ ചികിത്സയ്ക്കായി മാറ്റി വച്ച പണം മുഖ്യമന്ത്രിയുടെ ദുരിതാശ്വാസ നിധിയിലേക്ക് അയക്കാൻ തീരുമാനിച്ച അനസിന് അഭിനന്ദനങ്ങൾ. തന്റെ വിഷമത്തേക്കാൾ വലുത് അന്യന്റെ ദുരിതമാണെന്നവികാരമാണ് അനസിനെ ഇങ്ങനൊരു പ്രവൃത്തിയിലേക്ക് നയിച്ചിട്ടുണ്ടാവുക.
എന്നാൽ കുഞ്ഞിന്റെ ചികിത്സ തുടരേണ്ടത് അത്യാവശ്യമാണ്. അനസുമായി ഫോണിൽ സംസാരിച്ചിരുന്നു. റീജിയണൽ കാൻസർ സെന്ററിൽ ചികിത്സ ഉറപ്പുവരുത്താനാവശ്യമായ നടപടികൾ സ്വീകരിക്കും.കുഞ്ഞ്‌ വേഗം സുഖം പ്രാപിക്കട്ടെ എന്ന് ആശംസിക്കുന്നു.
തിരുവവന്തപുരത്തെ റീജിയണൽ ക്യാൻസര്‍ സെന്‍ററിലേയ്ക്ക് ചികിത്സയ്ക്കായി മകനെയും കൂട്ടി പോകാൻ ഒരുങ്ങുകയായിരുന്ന അനസ് താൻ ചികിത്സയ്ക്കായി സ്വരുക്കൂട്ടി വെച്ച തുക പ്രളയ ദുരിതാശ്വാസ നിധിയിലേയ്ക്ക് സംഭാവന ചെയ്യാൻ തീരുമാനിക്കുകയായിരുന്നു. ചികിത്സയ്ക്കായി കരുതി വെച്ച തുകയും ഇതിനായി മറ്റു രണ്ടു പേര്‍ നല്‍കിയ പണവും മുഖ്യമന്ത്രിയുടെ ദുരിതാശ്വാസ നിധിയിലേയ്ക്ക് അയയ്ക്കാൻ തീരുാമാനിച്ചെന്നായിരുന്നു അനസ് അറിയിച്ചത്. പ്രളയത്തിൽ എല്ലാം നഷ്ടപ്പെട്ടവരോളം വരില്ല തന്‍റെ വിഷമമെന്നായിരുന്നു അനസിന്‍റെ വാക്കുകള്‍. എന്നാൽ അനസിന്‍റെ വാര്‍ത്ത കേട്ടറിഞ്ഞ സര്‍ക്കാര്‍ കുട്ടിയുടെ ചികിത്സാ ചെലവ് ഏറ്റെടുക്കുകയായിരുന്നു.